O pasado 24 de maio celebrouse no Auditorio Municipal de Ourense o II Foro de Proturga co título Enoturismo en Galicia: Iniciativas, Experiencias e Retos. A escolla de Ourense como lugar de celebración viu marcada pola forte presenza da industria vitivinícola nesta terra xa que catro das cinco Denominacións de Orixe de Galicia atópanse na provincia ourensana.
O foro xirou ao redor de catro mesas redondas onde estiveron presentes diferentes profesionais relacionados co mundo do viño, da comunicación, da docencia universitaria, e do enoturismo.
Unha vez inaugurado o Foro por parte dos representantes políticos a xornada de mañá comezaba coa mesa que levaba por título Iniciativas, experiencias e retos dos Consellos Reguladores das Denominacións de Orixe de Galicia. A mesa versou sobre a historia destes entes e as iniciativas enoturísticas postas en marcha en cada un deles. As conclusións acadadas reflicten que aínda queda moito por facer en materia enoturística (non é sinxelo involucrar as adegas para desenrolar actividades enoturísticas); tamén revelouse a necesidade de crear un sistema para valorar a satisfacción do enoturista e así ir mellorando o servizo. En canto a comunicación entre as denominacións descubrimos que, curiosamente, a aplicación do whatsApp usase para tal fin.
A segunda mesa da mañá dedicábase ás Iniciativas, experiencias e retos das Rutas do Viño de Galicia. Nesta mesa falouse da necesidade de formación dos traballadores das adegas, a maneira de impulsar as Rutas do Viño, as accións levadas a cabo, como as coñecidas Xornadas de Portas Abertas nas Adegas de Galicia e o Bus do Viño, exemplos de iniciativas enoturísticas de éxito na nosa comunidade.
Unhas das conclusións claras foi que nas rutas do viño non só hai adegas para visitar senón que no entorno existen infinidade de recursos turísticos para complementar a oferta enolóxica, sexa patrimonio histórico-artístico, festas e romerías ou turismo náutico, entre outros.
A última mesa redonda da mañá estivo dedicada a aquelas empresas con actividades no eido do enoturismo. Entre elas atopábase Enoturismo Galicia, oTren Turístico da Ribeira Sacra Aba Sacra, a axencia especializada en enoturismo Tee Travel e La Alacena Roja revista especializada en gastronomía, turismo e viños. Con eles descubrimos que existen iniciativas tan interesantes como ser adegueiro por un día, un tour pola viticultura heroica da Ribeira Sacra, entre outras interesantes actividades enoturísticas.
Tras o xantar networking tivo lugar a entrega do premio á Mellor Traxectoria Profesional que foi recaer na socia Iria Caamaño, Guía Oficial de Galicia eDocente do Master Interuniveristario en Dirección e Planificación do Turismo da Universidade da Coruña.
E tras a entrega do galardón chegaba a quenda da mesa da tarde na que diferentes adegas (Pazo Baión, Adegas Valdavia e Adegas e Viñedos Vía Romana), contaban a súa experiencia co enoturismo. Os representantes das tres adegas coincidían en que hai que«Estar orgullosos do que facemos, creelo e trasmitilo» e que toda Galicia é un destino vitivinícola, polo que hai que vendelo como tal. Unha das principais problemáticas das que se falaron son os horarios de apertura das adegas, e a falta dun persoal formado (idiomas, orientación ó cliente), para a atención de visitantes durante os fins de semana e festivos, momentos de máxima afluencia de turistas.
Unha vez rematada a última mesa o foro cerrouse cunha cata de viños ofrecida polo sumiller Patxi Movilla, da Gastroteca SCQ onde os participantes tiveron a oportunidade de degustar viños galegos.
Pola nosa parte gustaríanos resaltar que a asociación fai posible este tipo de eventos grazas o esforzo e tesón dos que forman parte dela, xa que apenas conta con recursos económicos. Por iso non queremos deixar de dar as grazas ós nosos colaboradores e a súa predisposición á hora de formar parte do Foro. Agradecer a súa axuda ós socios e socias de Proturga que formaron parte da organización. Grazas tamén a todas as persoas que promocionaron o evento e tamén a aqueles que se achegaron ata Ourense. E a tod@s os que asistíchedes agradecervos a vosa presencia, esperamos que fose do voso agrado e vémonos no III Foro Proturga. Por certo, a seguinte edición será na provincia da Coruña, ocorréseche algún tema?
Fotos do Foro no seguinte enlace:
https://plus.google.com/photos/103663633616678800686/albums/6019537954260961089
