Cada ano PROTURGA como asociación de Profesionais do turismo de Galicia oferta diversas actividades, entre as que destacan os talleres de turismo accesible, e este ano para profundar máis, non podía faltar o IV Foro PROTURGA – Do Turismo Accesible ao Turismo Sensitivo – no que poden inscribirse profesionais e empresas tanto do sector turístico como doutros.
Nesta edición vanse expor temas importantes e que afectan a todos os sectores implicados no turismo, pois, turismo somos todos e Galicia tense que implicar con todos os turistas.
Por iso necesitamos un turismo accesible para todos, para que as persoas con diversidade funcional (física, visual, auditiva, sensorial, etc) poidan desfrutar tamén de Galicia como destino turístico.
“Facer sentir o destino Galicia como unha experiencia única para todos”
O Foro terá lugar o xoves 1 e venres 2 de decembro no Auditorio da Cidade Infantil Príncipe Felipe en Pontevedra.
A primeira xornada inaugurarase coa mesa redonda sobre “Necesidades dos turistas con diversidade funcional” e contaremos para falar do tema con membros da FAXPG, ONCE e a Asociación Juan XXIII.
Durante o descanso, os alumnos e profesorado do CIFP Carlos Oroza teñen preparado para todos os participantes un café sensitivo onde poremos a proba os nosos sentidos.
A mañá finalizará cunha mesa que tratará da aposta polo turismo accesible a nivel destino con exemplos de experiencias turísticas accesibles como os de Arousa Norte ou das empresas Hydronauta e o futuro proxecto de Cabanas accesibles en Outes.
Na quenda da tarde continuaremos cunha visita sensitiva por Pontevedra a cargo tamén do alumando do Carlos Oroza que pon en valor o traballo desenvolvido nestos últimos anos no centro en canto ao compromiso có turismo accesible e a capacidade creativa para deseñar experiencias turísticas baseadas no sentidos.
O venres darase paso no foro ás “Pautas de atención a un cliente con diversidade funcional – visual e auditiva – con relatorio por parte da ONCE e dunha Intérprete en Lingua de Signos.
Un monumento, un lugar, pódese visualizar non só coa vista tamén co tacto, cos sentidos, podendo darnos moitos datos como a forma ou tamaño, o ambiente, os olores, os sons …
O braille, os soportes táctiles, a lingua de signos, etc, son outras opcións para que todos poidamos desfrutar por exemplo dunha visita guiada. Un grupo pode ser moi diverso e pódese chegar a todo o noso público facendo uso de diferentes medios.
Para seguir poñendo a proba os nosos sentimos durante esta segunda xornada poderase desfrutar dunha cata sensitiva de queixos D.O Galicia e pans. Influír na mente a través dos sentidos, educar ao cerebro a recoñecer esencias, sabores aos que habitualmente non todos estamos acostumados a desenvolver.
Finalizaremos cunha Comida Sensitiva no Restaurante do Carlos Oroza a cargo tamén do alumnado do centro.
Quédanos moito por avanzar en materia de accesibilidade pero si cada un pomos o noso gran de area seguirmos NO BO CAMIÑO.
Eliminemos as barreiras mentais que son as máis difíciles de superar.
Destacar por último, que nesta edición, ademais de contar coa colaboración do CIFP Carlos Oroza, a empresa PROMOVE e todos os nosos socios particulares e empresas, contamos có patrocinio da Deputación de Pontevedra e Turismo Rías Baixas a través das axudas concedidas ás asociacións sen ánimo de lucro para actuacións e actividades de carácter turístico.
Máis información: http://proturga.org/iv-foro-experiencial-proturga/
