O tema das taxas turísticas é complexo e non exento de polémica entre a administración que as implanta, os propietarios dos establecementos turísticos encargados de cobrarllas aos seus clientes, e os turistas que son os que teñen que pagalas.

En España, entre os anos 2002 e 2003, púxose en marcha a ecotaxa nas Illas Baleares cun profundo rexeitamento por parte dos hoteleiros e que acabou desaparecendo. Unha das ideas esgrimidas na súa contra era que a taxa era discriminatoria, xa que so se aplicaba nos establecementos regrados, quedando fóra as vivendas privadas e establecementos non regrados, así como o temor á disminución de turistas.

Pola contra, no ano 2012, implantouse en Cataluña un imposto sobre estancias turísticas destinado á mellora e á promoción do turismo na comunidade, que segue funcionando coa colaboración dos empresarios hoteleiros.

¿Cal é a clave para que unha taxa turística funcione? Dende o meu punto de vista, estes serían os aspectos clave:

1. Cómpre facer unha boa política de comunicación, clarificando cal vai ser o uso dos cartos recaudados e mantendo a cooperación entre a administración pública e os establecementos privados, en canto aos obxectivos a acadar.
2. Os cartos deben revertir única e exclusivamente na mellora do sector turístico, de tal xeito que os encargados de recaudalo experimenten os seus beneficios
3. A taxa debe ser baixa e limitada a estadías cortas de forma que non se transforme nunha carga non asumible por parte dos viaxeiros

En España, en xeral hai bastantes reticencias á implantación deste tipo de taxas, xa que se considera que poden dañar a competitividade do sector, xunto coa perda de turistas. Nembargantes, países veciños coma Italia e Francia levan anos aplicándoas e os visitantes seguen acudindo á chamada dos reclamos turísticos. Nesta pasada semana saiu a nova de que na cidade de Lisboa durante o ano 2015 vaise implantar unha taxa para os turistas que cheguen vía aeroporto e porto e, no ano 2016, vaise xeralizar.

Está claro que máis recursos económicos poderían axudar ao sector na súa modernización ao tempo que se disporía dun maior orzamento para a promoción e atracción de máis turistas.

Penso que este é un tema moi aberto e dado que a Proturga pertencen profesionais que traballan nos distintos ámbitos do turismo sería interesante coñecer os vosos comentarios. E ti, ¿qué opinión tes?